ਧੰਨ ਗੁਰੂ ਦੇ ਸਿੱਖ ਅਕਲ ਦੇ ਪੱਕੇ ਵੈਰੀ ....

- ਪ੍ਰੋਫ਼ੈਸਰ ਕਵਲਦੀਪ ਸਿੰਘ ਕੰਵਲ

ਵਾਹ ਸਿੱਖੋ ਜੱਗੋਂ ਅੱਡਰੀ ਕੌਮ ਹੋ ਤੁਸੀਂ ! ਅਗਲੇ ਤੁਹਾਨੂੰ ਘਰਾਂ ਵਿੱਚ ਵੜ ਕੇ ਸਾੜ ਗਏ, ਗਲਾਂ ਵਿੱਚ ਟਾਇਰ ਪਾ ਕੇ ਤੁਹਾਡੀ ਜਿਉਂਦੀ ਚਿਤਾ ਬਾਲੀ, ਧੀਆਂ-ਭੈਣਾਂ ਅੱਖਾਂ ਦੇ ਸਾਹਮਣੇ ਨੰਗੀਆਂ ਕਰ ਕੇ ਇਜ਼ਤਾਂ ਲੁੱਟੀਆਂ, ਹੋਰ ਤੇ ਹੋਰ ਬੁੱਢੇ ਤੇ ਬੱਚੇ ਵੀ ਨਹੀਂ ਛੱਡੇ ਕਾਤਲਾਂ ਨੇ, ਦੋੜ੍ਹਾ-੨ ਕੇ ਬਜ਼ਾਰਾਂ ਵਿੱਚ ਕਤਲ ਕੀਤਾ ਤੇ ਇੱਥੋਂ ਤਕ ਕਿ ਨਵਜੰਮੇ ਬੱਚਿਆਂ ਤੱਕ ਨੂੰ ਗੈਸ ਦੇ ਉੱਪਰ ਭੁੰਨਿਆ, ਪਰ ਮਜ਼ਾਲ ਹੈ ਤੁਹਾਨੂੰ ਰਤਾ ਵੀ ਸੇਕ ਲੱਗਿਆ ਹੋਵੇ !

ਇਹਤੋਂ ਵੀ ਉੱਤੇ ਧੰਨ ਹੈ ਤੁਹਾਡਾ ਸਬਰ ਕਿ ਅਗਲਿਆਂ ਨੇ ਤੀਹ ਸਾਲ ਇਨਸਾਫ਼ ਉਡੀਕਦਿਆਂ ਪੱਥਰ ਕਰ ਮਾਰਿਆ, ਕਚਹਿਰੀਆਂ ਵੀ ਢਹਿ ਗਈਆਂ ਬਣਾਵਟੀ ਤੇ ਬੇਨਤੀਜਾ ਸੁਣਵਾਈਆਂ ਕਰਦਿਆਂ, ਪਰ ਸਦਕੇ ਤੁਹਾਡੀ ਜ਼ਮੀਰ ਦੇ ਸੁੱਤੀ ਦੀ ਸੁੱਤੀ ਰਹੀ !

ਹੋਰ ਤੇ ਹੋਰ ਐਂਤਕੀ ਤੇ ਨਵੀਂ ਕਰਾਮਾਤ ਹੀ ਕਰਨ ਲੱਗੇ ਹੋ ਤੁਸੀਂ, ਜਿੱਦਣ ਅਗਲਿਆਂ ਨੇ ਤੁਹਾਡੀਆਂ ਲਾਸ਼ਾਂ ਦੇ ਢੇਰ ਲਾ ਕੇ ਕੁੱਤਿਆਂ ਦੇ ਢਿੱਡ ਭਰਨ ਦਾ ਇੰਤਜ਼ਾਮ ਕੀਤਾ ਸੀ, ਉੱਦਣ ਹੀ ਜਹਾਨ ਭਰ ਦੀਆਂ ਖੁਸ਼ੀਆਂ ਮਨਾਉਣ ਦੀਆਂ ਤਿਆਰੀਆਂ ਕਰੀ ਬੈਠੇ ਜੇ; ਵਾਹ ਚਲਾਓ, ਚਲਾਓ, ਆਤਸ਼ਬਾਜ਼ੀਆਂ ਚਲਾਓ, ਮਨਾਓ ਆਪਣੇ ਕਤਲਾਂ ਦੀਆਂ ਖੁਸ਼ੀਆਂ, ਅਖੇ ਬੜਾ ਚੰਗਾ ਹੋਇਆ ਸਾਨੂੰ ਕੋਹ ਕੋਹ ਕੇ ਮਾਰਿਆ, ਜਦ ਅਣਖ ਹੀ ਮਰ ਗਈ ਸਾਡੀ, ਹੁਣ ਅਸੀਂ ਹੈ ਵੀ ਇਸੇ ਦੇ ਲਾਇਕ !

ਅਖੇ ਦਿਓ ਸੱਦਾ ਅਗਲੇ ਨੂੰ ਕਿ ਪਿਛਲੀਂ ਵਾਰੀਂ ਤੇ ਤੁਸੀਂ ਰਤਾ ਘੱਟ ਕੀਤਾ ਸੀ, ਅਜੇ ਤਾਂ ਸਾਡੇ ਕੋਲ ਹੋਰ ਮਾਵਾਂ-ਭੈਣਾਂ ਹੈਗੀਆਂ ਨੇ ਤਿਆਰ-ਬਰ-ਤਿਆਰ ਅੱਗੇ ਪਰੋਸ ਕੇ ਰੱਖਣ ਨੂੰ, ਤੁਹਾਡੀ ਹਵਸ ਦੀ ਪਿਆਸ ਮਿਟਾਉਣ ਨੂੰ, ਸੋ ਦੇਰ ਨਾ ਲਾਓ, ਆਓ ਤੇ ਆ ਕੇ ਕਰੋ ਨੰਗਾ ਤੇ ਰੋਜ਼ਾਨਾ ਕਰੋ ਉਹਨਾਂ ਦੇ ਬਲਾਤਕਾਰ, ਅਸੀਂ ਸੀ ਵੀ ਨਹੀਂ ਕਰਾਂਗੇ ਬਲਕਿ ਤੁਹਾਡੇ ਨਾਲ ਮਿਲ ਕੇ ਪਟਾਖੇ ਚਲਾਵਾਂਗੇ, ਫੁਲਝੜੀਆਂ ਤੇ ਆਤਿਸ਼ਬਾਜ਼ੀਆਂ ਫੂਕਾਂਗੇ, ਤੇ ਫ਼ੇਰ ਵੀ ਜੇ ਤੁਹਾਡੀ ਪਿਆਸ ਨਾ ਬੁਝੇ ਤਾਂ ਮਨਾਓ ਆਪਣੇ ਤਿਉਹਾਰ ਸਾਡੀਆਂ ਜ਼ਿੰਦਾ ਲਾਸ਼ਾਂ ਨੂੰ ਬਜਾਰਾਂ ਵਿੱਚ ਸਾੜ ਕੇ, ਤੇ ਸਾਨੂੰ ਤੁਸੀਂ ਆਪਣੇ ਨਾਲ ਹੀ ਪਾਵੋਗੇ ਮਿਠਾਈਆਂ ਵੰਡਦੇ ਹੋਏ, ਹਰ ਵਾਰ, ਹਰ ਸਾਲ !!

ਲਾਹਨਤ ਹੈ ਸਿੱਖੋ ! ਤੁਹਾਡੀ ਹੋਂਦ ‘ਤੇ ਲਾਹਨਤ ਹੈ !!! ਜਿਹੀ ਬੇਗੈਰਤ ਤੁਹਾਡੀ ਹੋਂਦ ਹੈ ਤੁਸੀਂ ਮਿਟਦੇ ਹੀ ਭਲੇ ਹੋ !!

ਧੰਨ ਗੁਰੂ ਦੇ ਸਿੱਖ ਅਕਲ ਦੇ ਪੱਕੇ ਵੈਰੀ ....

ਬੀਬੀ ਹਰਪ੍ਰੀਤ ਕੌਰ ਖਾਲਸਾ ਅਤੇ ਪ੍ਰੋਫ਼ੈਸਰ ਕਵਲਦੀਪ ਸਿੰਘ ਕੰਵਲ ਜ਼ੀ ਪੰਜਾਬੀ ‘ਤੇ

ਹੁਣ ਨੰਬਰ ਤੁਹਾਡਾ

- ਪ੍ਰੋਫ਼ੈਸਰ ਕਵਲਦੀਪ ਸਿੰਘ ਕੰਵਲ

ਬੇਹੋਸ਼ ਅਕਸਰੀਅਤ ਦੇ ਫ਼ੈਸਲੇ ਕਿਸੇ ਜਮਹੂਰੀ ਕ਼ਿਰਦਾਰ ਦੀ ਤਰਜ਼ੁਮਾਨੀ ਨਹੀਂ ਕਰਦੇ ਬਲਕਿ ਇੱਕ ਜਮਹੂਰੀ ਨਿਜ਼ਾਮ ਦੇ ਮੂੰਹ ਵੱਜਿਆ ਜ਼ੋਰਦਾਰ ਤਮਾਚਾ ਹਨ ! ਪਿਛਲੇ ਦਿਨੀਂ ਦਿੱਲੀ ਦੀ ਤਿਹਾੜ ਜੇਲ ਵਿੱਚ ਕਾਨੂੰਨ ਤੇ ਆਈਨ (ਸੰਵਿਧਾਨ) ਦਾ ਸ਼ਰੇਆਮ ਕਤਲ ਕਰ ਚੁੱਪਚਾਪ ਪਾਰਲੀਮੈਂਟ ‘ਤੇ ਹਮਲੇ ਦੇ ਕਥਿਤ ਸ਼ੱਕੀ ਅਫ਼ਜਲ ਗੁਰੂ ਨੂੰ ਦਿੱਤੀ ਫਾਂਸੀ ਨੇ ਇੱਕ ਬਹੁਤ ਅਹਿਮ ਸਵਾਲ ਹਿੰਦੁਸਤਾਨ ਦੀ ਤਥਾਕਥਿਤ ਜਮਹੂਰੀਅਤ ਦੇ ਸਾਹਮਣੇ ਲਿਆ ਖੜਾ ਕੀਤਾ ਹੈ ਕਿ, ਕੀ ਅਦਲੀਆ ਦੇ ਫ਼ੈਸਲਿਆ ਦਾ ਅਧਾਰ ਹੁਣ ਆਈਨ ਨਾ ਹੋ ਕੇ ਅਕਸਰੀਅਤ ਹੋ ਗਈ ਹੈ ?

ਫ਼ੇਰ ਸਿਰਫ਼ ਬਹੁਗਿਣਤੀ ਦੇ ਦਬਾਵ ਵਿੱਚ ਤੇ ਸਿਆਸੀ ਲਾਹਾ ਲੈਣ ਲਈ ਫਾਂਸੀ ਦੇਣ ਲੱਗੇ, ਕਾਨੂੰਨ ਵਿੱਚ ਸੁਰਖਿਅਤ ਕੀਤੇ ਹਕੂਕ “ਆਪਣੀ ਫਾਂਸੀ-ਮੁਆਫ਼ੀ ਰੱਦ ਹੋਣ ਦੇ ਖਿਲਾਫ਼ ਅਪੀਲ” ਨੂੰ ਨਕਾਰਨਾ, ਕੀ ਇਸ ਫਾਂਸੀ ਨੂੰ ਕਾਨੂੰਨੀ-ਕਤਲ ਨਹੀਂ ਬਣਾਉਂਦਾ ? ਇਸ ਤੋਂ ਵੀ ਉੱਪਰ ਫਾਂਸੀ ਦੇਣ ਤੋਂ ਪਹਿਲਾਂ ਮਰਨ ਵਾਲੇ ਦੇ ਪਰਿਵਾਰ ਨੂੰ ਫਾਂਸੀ ਦੀ ਜਾਣਕਾਰੀ ਤੋਂ ਵਿਰਵੇ ਰੱਖਣਾ, ਮਰਨ ਵਾਲੇ ਨੂੰ ਉਸ ਦੇ ਪਰਿਵਾਰ ਨਾਲ ਨਾ ਮਿਲਣ ਦੇਣਾ, ਕੀ ਇਸ ਅਖੌਤੀ ਜਮਹੂਰੀਅਤ ਨੂੰ ਫਾਸੀਵਾਦੀ ਸਾਬਿਤ ਨਹੀਂ ਕਰਦਾ ? ਬਾਕੀ ਸਿਰਫ਼ ਸ਼ੱਕ ਦੇ ਅਧਾਰ ‘ਤੇ ਮੁਜ਼ਰਮਾਨਾ ਸਾਜ਼ਿਸ਼ ਵਿੱਚ ਸ਼ਾਮਿਲ ਹੋਣ ਦੀਆਂ ਧਾਰਾਵਾਂ ਹੇਠ ਫਾਂਸੀ ਦੇਣਾ ਆਪਣੇ ਆਪ ਵਿੱਚ ਕਨੂੰਨੀ-ਕਤਲ ਦੇ ਨੁਕਤੇ ਨੂੰ ਹੋਰ ਪੁਖ਼ਤਾ ਕਰਦਾ ਹੈ !

ਹੈਰਾਨੀ ਤਾਂ ਇੱਥੋਂ ਤੱਕ ਹੈ ਕਿ ਯੂ.ਐਨ.ਓ. ਵਿੱਚ ਪੱਕੀ-ਮੈਂਬਰੀ ਦਾ ਦਾਅਵਾ ਕਰਨ ਵਾਲਾ ਮੁਲਕ ਆਪਣੇ ਆਈਨ ਵਿੱਚ ਦਰਜ ਸ਼ਹਿਰੀਆਂ ਦੇ ਮਨੁੱਖੀ ਆਜ਼ਾਦੀ, ਸਨਮਾਨ ਤੇ ਪ੍ਰਗਟਾਓ ਦੇ ਮੌਲਿਕ ਹਕੂਕਾਂ ਨੂੰ ਇਸ ਤਰਾਂ ਨਕਾਰ ਕੇ ਕਿਹੜੀ ਯੋਗਤਾ ਦਾ ਸਬੂਤ ਦੇ ਰਿਹਾ ਹੈ ? ਕਮਾਲ ਹੈ ਕਿ ਇੱਕ ਪੂਰੀ ਸਟੇਟ ਵਿੱਚ ਕਰਫਿਊ ਤੇ ਸਭ ਅਖ਼ਬਾਰ, ਮੋਬਾਇਲ, ਟੀਵੀ, ਇੰਟਰਨੈੱਟ, ਗੱਲ ਕੀ ਸੂਚਨਾ-ਪ੍ਰਸਾਰਨ ਜਾਂ ਪ੍ਰਗਟਾਓ ਦਾ ਹਰ ਸਾਧਨ ਬੈਨ ਕਰ ਕੇ ਪੂਰੀ ਮਨੁੱਖੀ ਆਬਾਦੀ ਨੂੰ ਅਣਐਲਾਨੀ ਕੈਦ ਵਿੱਚ ਰੱਖ ਦਿੱਤਾ ਗਿਆ, ਤੇ ਜਿਸ ਵਿਰੋਧ ਕੀਤਾ ਉਸਨੂੰ ਸ਼ਰੇਆਮ ਗੋਲੀਆਂ ਦਾ ਸ਼ਿਕਾਰ ਬਣਾਇਆ ਗਿਆ; ਕੀ ਇਹ ਆਈਨ ਦੇ ਮੌਲਿਕ-ਹਕੂਕਾਂ ਦਾ ਸ਼ਰੇਆਮ ਕਤਲ ਨਹੀਂ ? ਮਤਲਬ, ਹਿੰਦੁਸਤਾਨ ਨੇ ਖ਼ੁਦ ਆਪਣੇ ਆਈਨ ਦਾ ਭੋਗ ਪਾ ਦਿੱਤਾ; ਉਸ ਤੋਂ ਵੀ ਵੱਧ ਇਹ ੧੯੪੮ ਦੇ ਖ਼ੁਦ ਯੂ.ਐਨ.ਓ. ਦੀ ਸਰਪ੍ਰਸਤੀ ਹੇਠ ਜਾਰੀ ਕੀਤੇ ਮਨੁੱਖੀ ਅਧਿਕਾਰਾਂ ਦੇ ਚਾਰਟਰ ਨੂੰ ਤਿਲਾਂਜਲੀ ਹੈ, ਜਿਸ ‘ਤੇ ਹਿੰਦੁਸਤਾਨ ਨੇ ਨਾ ਕੇਵਲ ਹਸਤਾਖਰ ਕੀਤੇ ਨੇ ਬਲਕਿ ਇਸਨੂੰ ਬਣਾਉਣ ਵਾਲੇ ਮੋਢੀ ਮੁਲਕਾਂ ਦਾ ਮੈਂਬਰ ਵੀ ਰਿਹਾ ਹੈ; ਅਜਿਹਾ ਕਾਰਾ ਪੱਕੀ-ਮੈਂਬਰੀ ਤਾਂ ਛੱਡੋ ਹਿੰਦੁਸਤਾਨ ਨੂੰ ਯੂ.ਐਨ.ਓ ਦੀ ਮੁੱਢਲੀ ਮੈਂਬਰੀ ਤੋਂ ਖ਼ਾਰਜ ਕਰਨ ਦੇ ਯੋਗ ਬਣਾ ਛੱਡਦਾ ਹੈ !

ਅਸਲ ਵਿੱਚ ਭਾਵੇਂ ਕਸ਼ਮੀਰ ਹੋਵੇ, ਪੰਜਾਬ ਜਾਂ ਨਾਗਾਲੈਂਡ, ਜਿੱਥੇ ਕਿਤੇ ਵੀ ਘੱਟ-ਗਿਣਤੀ ਕੌਮਾਂ ਇਸ ਮੁਲਕ ਵਿੱਚ ਵਸਦੀਆਂ ਨੇ, ਉਹ ਇਸ ਮੁਲਕ ਦੇ ਕੇਵਲ ਬਹੁਗਿਣਤੀ ਦੇ ਤਾਰਜ਼ੁਮਾਨ ਨਿਜ਼ਾਮ ਵਲੋਂ ਦੁਸ਼ਮਣ ਦੀ ਨਿਗਾਹ ਨਾਲ ਹੀ ਦੇਖੀਆਂ ਜਾਂਦੀਆਂ ਹਨ; ਵਤਨ ਪ੍ਰਸਤੀ ਦੇ ਨਾਮ 'ਤੇ ਹਰ ਵੱਖਰੀ ਸੋਚ ਨੂੰ ਬਹੁਗਿਣਤੀ ਵਲੋਂ ਗੱਦਾਰ ਕਹਿ ਜਾਂ ਗੋਲੀ ਜਾਂ ਫਾਂਸੀ ਬਖ਼ਸ਼ ਕੇ ਪਲ-੨ ਗ਼ੁਲਾਮੀ ਦਾ ਅਹਿਸਾਸ ਕਰਵਾਇਆ ਜਾਂਦਾ ਹੈ ! ਇੰਡੀਅਨ ਪੀਨਲ ਕੋਡ ਧਾਰਾ ੧੨੦-ਬੀ (ਮੁਜ਼ਮਰਾਨਾ ਸਾਜਿਸ਼ - ਸ਼ੱਕ ਦੇ ਅਧਾਰ 'ਤੇ) ਵਿੱਚ ਸਿਰਫ਼ ਘੱਟਗਿਣਤੀ ਕੇਹਰ ਸਿੰਘ, ਅਫਜਲ ਗੁਰੂ, ਦਵਿੰਦਰਪਾਲ ਸਿੰਘ ਭੁੱਲਰ ਤਾਂ ਫਾਂਸੀ ਲੱਗ ਸਕਦੇ ਨੇ, ਪਰ ਰਾਜੀਵ ਗਾਂਧੀ, ਅਡਵਾਨੀ, ਮੋਦੀ, ਤੋਗੜੀਆ, ਸਾਧਵੀ ਪ੍ਰੱਗਿਆ ਸਭ ਮੌਜਾਂ ਮਾਣਦੇ ਨੇ, ਉਹ ਵੀ ਇਸ ਮੁਲਕ ਦੇ ਕਾਨੂੰਨ ਨਾਲ ਵਿਭਚਾਰ ਕਰ ਕੇ !!

ਅੰਤ ਵਿੱਚ ਇਸ ਮੁਲਕ ਦੇ ਫਾਸੀਵਾਦੀ ਨਿਜ਼ਾਮ ਦੇ ਹੱਥੋਂ ਵਾਰ-੨ ਖ਼ੁਆਰ ਹੋਣ ਦੇ ਬਾਵਜੂਦ ਖ਼ੁਸ਼ਫਹਿਮੀਆਂ ਤੇ ਵਕਤੀ ਨਿਜੀ ਮੁਫਾਦਾਂ ਦੀ ਘੁੰਮਣਘੇਰੀ ਵਿੱਚ ਮਾਨਸਿਕ ਤੌਰ ‘ਤੇ ਬੋਂਦਲਾਈ ਇਸ ਮੁਲਕ ਦੀ ਸਿੱਖ ਘੱਟਗਿਣਤੀ ਨੂੰ ਕਹਿਣਾ ਚਾਹਵਾਂਗਾ ਕਿ ਭਗਵਿਆਂ ਦੇ ਤਲਵੇ-ਚੱਟਾਂ ਦੀ ਜਮਾਤ ਨੂੰ ਕੇਵਲ ਚੰਦ ਸੁਆਰਥਾਂ ਕਾਰਨ ਵੋਟਾਂ ਦੇ ਨਾਲ-੨ ਆਪਣੀਆਂ ਪਗੜੀਆਂ ਤੇ ਇਜ਼ਤਾਂ ਪਰੋਸ ਕੇ ਧਰਨ ਵਾਲਿਓ ਤੁਸੀਂ ਵੀ ਘਬਰਾਓ ਨਾ, ਅਗਲਾ ਨੰਬਰ ਤੁਹਾਡੇ ਦਵਿੰਦਰਪਾਲ ਸਿੰਘ ਭੁੱਲਰ, ਬਲਵੰਤ ਸਿੰਘ ਰਾਜੋਆਣੇ, ਜਗਤਾਰ ਸਿੰਘ ਹਵਾਰੇ ਇਤਿਆਦਿਕ ਦਾ ਹੀ ਲੱਗਣਾ ਹੈ, ਪਰ ਨਹੀਂ, ਤੁਹਾਡੇ ਤੇ ਉਹ ਹੈ ਹੀ ਨਹੀਂ !

ਸ਼੍ਰੋਮਣੀ ਕਮੇਟੀ ਦੇ ਦੋ ਸਾਲਾ ਸਿੱਖ ਧਰਮ ਅਧਿਐਨ ਪੱਤਰ-ਵਿਹਾਰ ਕੋਰਸ ਦੇ ਨਾਮ ਹੇਠ ਗੁਰਮਤਿ ਸਿਧਾਂਤਾਂ ਦੇ ਖਾਤਮੇ ਦੀ ਸਾਜਿਸ਼

• ਪ੍ਰੀਖਿਆਰਥੀਆਂ ਨੂੰ ਪੁੱਛੇ ਜਾ ਰਹੇ ਹਨ ਸਿੱਖ ਗੁਰੂਆਂ ਤੇ ਇਤਿਹਾਸ ਨੂੰ ਬਦਨਾਮ ਕਰਨ ਵਾਲੇ ਗ੍ਰੰਥਾਂ ਵਿੱਚੋਂ ਪ੍ਰਸ਼ਨ
• ਗੁਰਮਤਿ ਪ੍ਰਣਾਏ ਸਿੱਖ ਵਿਦਵਾਨਾਂ ਤੇ ਉਹਨਾਂ ਦੀਆਂ ਲਿਖਤਾਂ ਨੂੰ ਅੱਖੋਂ ਪਰੋਖੇ ਕਰਨ ਦਾ ਕੋਝਾ ਯਤਨ

- ਪ੍ਰੋਫ਼ੈਸਰ ਕਵਲਦੀਪ ਸਿੰਘ ਕੰਵਲ

(੨੮/੦੧/੨੦੧੩, ਅੰਮ੍ਰਿਤਸਰ) ਸ਼ਬਦ-ਗੁਰੂ, ਗੁਰਮਤਿ ਤੇ ਸਿੱਖ ਸਿਧਾਂਤਾਂ ਦੇ ਪ੍ਰਸਾਰ ਲਈ ਕਰੜੀ ਘਾਲਣਾ ਤੋਂ ਬਾਅਦ ਹੋਂਦ ਵਿੱਚ ਲਿਆਂਦੀ ਗਈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਗੁਰਮਤਿ ਦੇ ਪ੍ਰਚਾਰ ਦੇ ਨਾਮ ਹੇਠ ਕਰਵਾਈ ਜਾਂਦੀ ਦੋ-ਸਾਲਾ ਸਿੱਖ-ਧਰਮ ਅਧਿਐਨ ਪੱਤਰ-ਵਿਹਾਰ ਕੋਰਸ ਦੀ ਪ੍ਰੀਖਿਆ ਵਿੱਚ ਸਿੱਖ-ਗੁਰੂਆਂ ਦੇ ਚਰਿੱਤਰ ਨੂੰ ਬਦਨਾਮ ਕਰਨ, ਸਿੱਖ-ਇਤਿਹਾਸ ਨੂੰ ਕਲੰਕਿਤ ਕਰਨ ਅਤੇ ਗੁਰਮਤਿ-ਸਿਧਾਂਤਾਂ ਦੇ ਖਾਤਮੇ ਦੀ ਸਾਜਿਸ਼ ਰਚਣ ਦਾ ਪਰਦਾਫਾਸ਼ ਅੱਜ ਉਸ ਵੇਲੇ ਹੋ ਗਿਆ ਜਦੋਂ ਇਸ ਪ੍ਰੀਖਿਆ ਦੇ ਪਹਿਲੇ ਸਾਲ ਦੇ “ਸਿੱਖ ਇਤਿਹਾਸ ਦੇ ਮੁੱਢਲੇ ਸੋਮੇ : ਮੁੱਢਲੀ ਜਾਣਕਾਰੀ” ਵਿਸ਼ੇ ਉੱਤੇ ਦੂਜੇ ਦਿਨ ਲਏ ਗਏ ਤੀਜੇ ਪਰਚੇ ਵਿੱਚ ਸਿੱਖ ਪੰਥ ਦੇ ਮੁਢਲੇ ਸੋਮਿਆਂ ਵਿੱਚ ਸਿਰਫ਼ ਤੇ ਸਿਰਫ਼ ਗੁਰੂ ਗ੍ਰੰਥ ਸਾਹਿਬ ਦੀ ਸਿੱਖਿਆ ਤੋਂ ਵਿਪਰੀਤ ਵਿਚਾਰ ਦੇਣ ਅਤੇ ਸਿੱਖ ਗੁਰੂਆਂ ਤੇ ਇਤਿਹਾਸ ਨੂੰ ਬਦਨਾਮ ਕਰਨ ਵਾਲੀਆਂ ਅਪ੍ਰਮਾਣੀਕ ਤੇ ਵਿਵਾਦਿਤ ਕਿਤਾਬਾਂ ਨੂੰ ਹੀ ਪ੍ਰਮੁੱਖ ਸਥਾਨ ਦੇ ਕੇ ਸਿੱਖ ਇਤਿਹਾਸ ਨੂੰ ਵਿਗਾੜਨ ਦਾ ਕੋਝਾ ਯਤਨ ਸਾਹਮਣੇ ਆਇਆ |

ਇੱਥੇ ਇਹ ਬਿਆਨ ਕਰਨਾ ਉਚਿਤ ਹੈ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਦੋ-ਸਾਲਾ ਪੱਤਰ-ਵਿਹਾਰ ਕੋਰਸ ਦੀ ਇਹ ਪ੍ਰੀਖਿਆ ਨੌਜਵਾਨ ਬੱਚੇ-ਬਚੀਆਂ ਨੂੰ ਕਈ ਪ੍ਰਕਾਰ ਦੇ ਮਾਇਕ ਵਜ਼ੀਫੇ ਤੇ ਹੋਰ ਇਨਾਮ, ਸਨਮਾਨ ਇਤਿਆਦਿਕ ਦੇ ਕੇ ਸਿੱਖ-ਧਰਮ ਦੇ ਸਿਧਾਂਤਾਂ ਪ੍ਰਤੀ ਜਾਗਰੂਕ ਕਰਨ ਦੇ ਉਦੇਸ਼ ਵਜੋਂ ਸ਼ੁਰੂ ਕੀਤੀ ਗਈ ਸੀ | ਪਰ ਇਸ ਤੋਂ ਉਲਟ ਜੇ ੨੮ ਜਨਵਰੀ ੨੦੧੩ ਨੂੰ ਹੋਏ ਇਸ ਤੀਜੇ ਪਰਚੇ ਦੇ ਪ੍ਰਸ਼ਨ ਪੱਤਰ ਨੂੰ ਗਹੁ ਨਾਲ ਵਾਚਿਆ ਜਾਵੇ ਤਾਂ ਕੁੱਲ ੩੫ ਛੋਟੇ ਪ੍ਰਸ਼ਨਾਂ ਵਿੱਚੋਂ ੧੯ ਅਤੇ ੫ ਵੱਡੇ ਪ੍ਰਸ਼ਨਾਂ ਵਿੱਚੋਂ ੪ ਗੁਰਮਤਿ ਵਿਰੋਧੀ ਕਿਤਾਬਾਂ ਦੇ ਸੰਬੰਧ ਵਿੱਚ ਪੁੱਛੇ ਗਏ ਹਨ, ਜਿਸ ਵਿੱਚੋਂ ਅਖੌਤੀ ਦਸਮ ਗ੍ਰੰਥ ਵਿੱਚੋਂ ੧੨ ਛੋਟੇ ਤੇ ੧ ਵੱਡਾ ਪ੍ਰਸ਼ਨ, ਭਾਈ ਗੁਰਦਾਸ ਦੂਜੇ ਦੀ ਵਿਵਾਦਿਤ ਇਕਤਾਲੀਵੀਂ ਵਾਰ, ਵਿਵਾਦਤ ਜਨਮ-ਸਾਖੀਆਂ, ਗੁਰਬਿਲਾਸ ਪਾਤਸ਼ਾਹੀ ੬ ਤੇ ੧੦, ਇਤਿਆਦਿਕ ਵਿੱਚੋਂ ੬ ਛੋਟੇ ਤੇ ੩ ਵੱਡੇ ਪ੍ਰਸ਼ਨ ਤੇ ਇੱਕ ਛੋਟਾ ਪ੍ਰਸ਼ਨ ਚਤੁਰਭੁਜ ਨਾਂ ਦੀ ਅਜਿਹੀ ਪੋਥੀ ਸੰਬੰਧੀ ਹੈ ਜਿਸਦਾ ਸਿੱਖ ਇਤਿਹਾਸ ਨਾਲ ਦੂਰ-੨ ਵੀ ਵਾਸਤਾ ਨਹੀਂ ਹੈ |

ਉੱਥੇ ਹੀ ਸਿੱਖ ਇਤਿਹਾਸ ਦੇ ਸਿਧਾਂਤਾਂ ਦੇ ਪ੍ਰਮਾਣਿਤ ਸੋਮਿਆਂ ਤੇ ਇਤਿਹਾਸਕਾਰਾਂ, ਵਿਦਵਾਨਾਂ, ਭਾਈ ਕਾਨ੍ਹ ਸਿੰਘ ਨਾਭਾ, ਭਾਈ ਕਰਮ ਸਿੰਘ ਹਿਸਟੋਰੀਅਨ, ਪ੍ਰੋ. ਗੁਰਮੁਖ ਸਿੰਘ, ਗਿਆਨੀ ਦਿੱਤ ਸਿੰਘ, ਪ੍ਰੋ. ਸਾਹਿਬ ਸਿੰਘ ਇਤਿਆਦਿਕ ਦਾ ਜ਼ਿਕਰ ਕਰਨਾ ਵੀ ਜਰੂਰੀ ਨਹੀਂ ਸਮਝਿਆ ਗਿਆ ਤਾਂ ਕਿ ਸਿੱਖੀ ਸਿਧਾਂਤਾਂ ਦੀ ਮੂਲ-ਜਾਣਕਾਰੀ ਦੀ ਪ੍ਰਾਪਤੀ ਵਲ ਰੁਚਿਤ ਨੌਜਵਾਨੀ ਨੂੰ ਸਹੀ ਸੇਧ ਤੋਂ ਵਿਰਵਿਆਂ ਰੱਖ ਜੜ੍ਹਾਂ ਤੋਂ ਤੋੜ੍ਹ ਸੋਚ ਨੂੰ ਹੀ ਨਸ਼ਟ ਕਰ ਦਿੱਤਾ ਜਾਵੇ | ਇਸ ਦੇ ਨਾਲ-ਨਾਲ ਦੇਸੀ ਤੇ ਵਿਦੇਸ਼ੀ ਪ੍ਰਮਾਣਿਕ ਇਤਿਹਾਸਿਕ ਸਰੋਤਾਂ ਨੂੰ, ਜੋ ਉਸ ਸਮੇਂ ਦੇ ਹਾਲਾਤਾਂ ਬਾਰੇ ਕਾਫ਼ੀ ਹੱਦ ਤਕ ਚਾਨਣਾ ਪਾਉਂਦੇ ਹਨ, ਕੋਈ ਸਥਾਨ ਨਾ ਦੇ ਕੇ, ਪ੍ਰੀਖਿਆਰਥੀਆਂ ਨੂੰ ਸਿੱਖੀ ਸੰਬੰਧੀ ਵੈਸ਼ਵਿਕ ਵਿਚਾਰਾਂ ਤੋਂ ਵਾਂਝਾ ਰੱਖ ਬੂਝੜ ਜਾਂ ਖੂਹ ਦਾ ਡੱਡੂ ਬਣਾਉਣ ਦਾ ਸ਼ਰਯੰਤਰਕਾਰੀ ਯਤਨ ਵੀ ਕੀਤਾ ਗਿਆ |

ਜਿਕਰਯੋਗ ਹੈ ਜਿੱਥੇ ਅਖੌਤੀ ਦਸਮ ਗ੍ਰੰਥ ਦੀ ਰਚਨਾ ੧੮੯੫ ਵਿੱਚ ਤਥਾਕਥਿਤ ਆਪੂੰ-ਥਾਪੀ ਸੋਧਕ ਕਮੇਟੀ ਵਲੋਂ ਵਜੂਦ ਵਿੱਚ ਲਿਆਏ ਜਾਣ ਤੋਂ ਹੀ ਆਪਣੀ ਅਸ਼ਲੀਲਤਾ, ਨਸ਼ਿਆਂ ਦੇ ਸਮਰਥਨ , ਚਰਿੱਤਰਹੀਣਤਾ, ਸਿੱਖੀ ਸਰੂਪ ‘ਤੇ ਹਮਲਿਆਂ ਅਤੇ ਗੁਰੂ-ਸਾਹਿਬਾਨ ਦੇ ਜੀਵਨ ਬਾਰੇ ਆਪ-ਹੁਦਰੀਆਂ ਗਲਤ ਬਿਆਨੀਆਂ ਕਰਨ ਕਾਰਨ ਇੱਕ ਵਿਵਾਦਿਤ ਕਿਤਾਬ ਰਹੀ ਹੈ, ਜਿਸਨੂੰ ਸਾਜਿਸ਼ ਅਧੀਨ ਗੁਰੂ ਗੋਬਿੰਦ ਸਿੰਘ ਸਾਹਿਬ ਦੇ ਨਾਮ ਨਾਲ ਜੋੜ ਕੇ ਸਿੱਖੀ ਵਿੱਚ ਸ਼ਬਦ-ਗੁਰੂ ਗੁਰੂ ਗਰੰਥ ਸਾਹਿਬ ਦੇ ਸ਼ਰੀਕ ਵਜੋਂ ਚੋਰ-ਦਰਵਾਜਿਓਂ ਘਸੋੜਨ ਦੇ ਗੰਭੀਰ ਯਤਨ ਚੱਲ ਰਹੇ ਹਨ ਅਤੇ ਇੱਕ ਕਿਤਾਬ ਵਜੋਂ ਜਿਸ ਵਿੱਚ ਪਹਿਲੇ ਦਰਜੇ ਦੇ ਪੱਧਰ ਦੀ ਵੀ ਕੋਈ ਇਤਿਹਾਸਿਕ ਜਾਣਕਾਰੀ ਨਹੀਂ ਮਿਲਦੀ ਜਿਸਦੇ ਚਲਦੇ ਇਸਨੂੰ ਇਤਿਹਾਸ ਦੇ ਮੂਲ ਸਰੋਤਾਂ ਵਿੱਚ ਗਿਣੇ ਜਾਣ ਦੇ ਕਾਬਿਲ ਸਮਝਿਆ ਜਾ ਸਕੇ; ਉੱਥੇ ਹੀ ਗੁਰ-ਬਿਲਾਸ ੬ ਤੇ ੧੦, ਜਨਮਸਾਖੀ ਬਾਲਾ, ਇਤਿਆਦਿਕ ਕਿਤਾਬਾਂ ਵਿੱਚ ਗੁਰੂ ਸਾਹਿਬਾਨ ਦੇ ਜੀਵਨ ਅਤੇ ਚਰਿੱਤਰ ਬਾਰੇ ਅਪ੍ਰਮਾਣੀਕ ਤੇ ਸਾਜਿਸ਼ੀ ਖੁਨਾਮੀ ਲਾਉਣ ਵਾਲੀਆਂ ਬਿਆਨੀਆਂ ਕੀਤੀਆਂ ਗਈਆਂ ਹਨ; ਸੋ ਇਹਨਾਂ ਸਭ ਅਪ੍ਰਮਾਣੀਕ ਤੇ ਘਟੀਆ ਪੱਧਰ ਦੀਆਂ ਰਚਨਾਵਾਂ ਨੂੰ ਇਸ ਪ੍ਰਕਾਰ ਮੁੱਖ-ਸਰੋਤਾਂ ਵਜੋਂ ਇਸ ਸਿੱਖ-ਇਤਿਹਾਸ ਦੀ ਇਸ ਪ੍ਰੀਖਿਆ ਵਿੱਚ ਪ੍ਰਮੁੱਖ ਦਰਜਾ ਦੇ ਕੇ ਸਥਾਪਿਤ ਕਰਨਾ ਸਮੂੰਹ ਪੰਥ-ਦਰਦੀਆਂ ਲਈ ਖਤਰੇ ਦੀ ਘੰਟੀ ਹੈ !

ਅਜਿਹਾ ਪ੍ਰਤੱਖ ਨਜ਼ਾਰਾ ਵੇਖ ਕੇ ਇਹ ਪ੍ਰਤੀਤ ਹੁੰਦਾ ਹੈ ਕਿ ਸਿੱਖਾਂ ਦੀ ਸਿਰਮੌਰ ਕਹਾਉਂਦੀ ਅਖੌਤੀ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਲੋਂ ਕਰਵਾਈ ਜਾ ਰਹੀ ਇਹ ਪੱਤਰ-ਵਿਹਾਰ ਪ੍ਰੀਖਿਆ ਅਸਲ ਵਿੱਚ ਸਿੱਖ ਧਰਮ ਅਧਿਐਨ ਨੇ ਨਾਮ ਥੱਲੇ ਇੱਕ ਬੇਹੱਦ ਗਹਿਰੀ ਚਾਲ ਅਧੀਨ, ਗੁਰਦੁਆਰਿਆਂ ਦੀਆਂ ਗੋਲਕਾਂ ਵਿੱਚ ਇਕੱਠਾ ਕੀਤਾ ਸਿੱਖਾਂ ਦਾ ਹੀ ਦਸਵੰਧ ਵਰਤ ਕੇ, ਸਿੱਖਾਂ ਦੇ ਇਤਿਹਾਸ ਦੇ ਨਾਮ ਦਾ ਪ੍ਰਾਪੇਗੰਡਾ ਕਰ, ਪੂਰੇ ਸਿੱਖ-ਸਿਧਾਂਤਾਂ ਤੇ ਸਮੁੱਚੇ ਰੂਪ ਵਿੱਚ ਸਿੱਖੀ ਦੀ ਨਿਆਰੀ-ਹੋਂਦ ਨੂੰ ਖੋਰਾ ਲਾਉਣ ਦਾ ਗੁੱਝਾ ਤੇ ਮਾਰੂ ਯਤਨ ਹੈ, ਜਿਸ ਨਾਲ ਸਿੱਖੀ ਪ੍ਰਤੀ ਜਾਗਰੂਕਤਾ ਦੀ ਚਾਹਵਾਨ ਰਹਿੰਦੀ-ਖੂੰਹਦੀ ਨੌਜਵਾਨੀ ਨੂੰ ਵਜ਼ੀਫਿਆ ਤੇ ਇਨਾਮਾਂ ਦੇ ਲਾਲਚ ਨੂੰ ਵਰਤ ਗੁਰਮਤਿ ਪ੍ਰਸਾਰ ਦੇ ਨਕਾਬ ਹੇਠ ਭਗਵੇਕਰਣ ਦੀ ਦਲਦਲ ਵਿੱਚ ਗਰਕ ਕਰਨ ਦਾ ਖ਼ਤਰਨਾਕ ਸਾਜਿਸ਼ੀ ਯਤਨ ਕੀਤਾ ਜਾ ਰਿਹਾ ਹੈ, ਜਿਸਤੋਂ ਵਕਤ ਰਹਿੰਦੇ ਹੀ ਸਾਵਧਾਨ ਹੋਣ ਦੀ ਜ਼ਰੂਰਤ ਹੈ |

ਅਜਿਹੇ ਮੌਕੇ ਸਮੂੰਹ ਜਾਗਰੂਕ ਕਹਾਉਂਦੇ ਤਬਕੇ ਨੂੰ ਇੱਕਮੁਠ ਹੋ ਇਸ ਸਾਜਿਸ਼ ਦਾ ਜਬਰਦਸਤ ਵਿਰੋਧ ਕਰਨਾ ਚਾਹੀਦਾ ਹੈ ਤਾਂਕਿ ਵੇਲਾ ਰਹਿੰਦੇ ਉੱਜੜੇ ਘਰ ਵਿੱਚ ਜੋ ਕੁਝ ਬਚਿਆ ਹੈ ਉਸਨੂੰ ਸੰਭਾਲ ਲਿਆ ਜਾਵੇ, ਵਰਨਾ ਇਹ ਨਾ ਹੋਵੇ ਕਿ ਕੱਲ ਨੂੰ ਸਿੱਖੀ ਦੇ ਮੂਲ ਸਿਧਾਂਤਾਂ ਨੂੰ ਜਾਣਨ ਵਾਲਾ ਟਾਵਾਂ ਟਾਵਾਂ ਵੀ ਮਿਲਣਾ ਨਾ-ਮੁਮਕਿਨ ਹੋ ਜਾਵੇ ...

ਤੱਤੁ ?ਮਤਿ ਪਰਿਵਾਰ ਦਾ ਧੰਨਵਾਦ : ਸ. ਰਾਜਿੰਦਰ ਸਿੰਘ ਖਾਲਸਾ ਪੰਚਾਇਤ

ੴਸਤਿਗੁਰਪ੍ਰਸਾਦਿ ॥
ਤੱਤੁ ?ਮਤਿ ਪਰਿਵਾਰ ਦਾ ਧੰਨਵਾਦ

ਮੈਂ ਅਤਿ ਧੰਨਵਾਦੀ ਹਾਂ ਤੱਤੁ ?ਮਤਿ ਪਰਿਵਾਰ ਦੇ ਸੰਚਾਲਕਾਂ ਦਾ ਜਿਨ੍ਹਾਂ ਮੈਨੂੰ ਭਗੌੜਾ ਕਰਾਰ ਦਿੱਤਾ ਹੈ।

• ਜੋ ਲੋਕ ਗੁਰੂ ਨਾਨਕ ਸਾਹਿਬ ਤੋਂ ਦਸਮ ਪਾਤਿਸ਼ਾਹ, ਗੁਰੂ ਗੋਬਿੰਦ ਸਿੰਘ ਸਾਹਿਬ ਤੱਕ ਨੂੰ ਗੁਰੂ ਕਹਿਣ ਅਤ ਮੰਨਣ ਤੋਂ ਇਨਕਾਰੀ ਹੋਣ,

• ਜਿਸ ਇਕੱਠ ਵਿੱਚ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਨੂੰ ਨਾਕਾਰ ਕੇ ਉਸ ਨੂੰ ਕੇਵਲ ਅੱਜ ਦੇ ਮੀਡੀਆ ਕੰਪਿਊਟਰ ਅਤੇ ਉਸ ਦੇ ਉਪਕਰਨਾਂ ਤੱਕ ਸੀਮਤ ਕਰਨ ਦੀ ਸੋਚ ਭਾਰੂ ਹੋਵੇ,

• ਜਿਸ ਇਕੱਠ ਵਿੱਚ ਆਨੰਦ ਕਾਰਜ ਦੀ ਸੰਸਥਾ ਦਾ ਭੋਗ ਪਾ ਕੇ, ਸਿੱਖਾਂ ਵਿੱਚ ਕੋਰਟ ਮੈਰਿਜ ਨੂੰ ਮਾਨਤਾ ਦੇਣ ਦੀ ਵਕਾਲਤ ਕੀਤੀ ਜਾਵੇ,

• ਜਿਥੇ ਸਿੱਖੀ ਸਰੂਪ ਦੀ ਵਿਲਖਣਤਾ ਦੇ ਪ੍ਰਤੀਕ ਕੇਸਾਂ ਨੂੰ ਡੈਡ ਸੈਲ ਆਖ ਕੇ, ਕੇਸਾਂ ਦੀ ਸੰਭਾਲ ਦੀ ਲੋੜ ਨੂੰ ਨਾਕਾਰਿਆ ਜਾਵੇ,

• ਜਿਥੇ ਖੰਡੇ ਦੀ ਪਾਹੁਲ ਦੀ ਸੰਸਥਾ ਨੂੰ ਬਰਬਾਦ ਕਰਨ ਵਾਸਤੇ ਕੇਸ, ਕ੍ਰਿਪਾਨ, ਕੜਾ, ਕੰਘਾ ਅਤੇ ਕਛਿਹਰੇ ਦੀ ਮਹੱਤਤਾ ਅਤੇ ਬਣਤਰ ਤੇ ਕਿੰਤੂ ਕੀਤੇ ਜਾਣ(ਇਨ੍ਹਾਂ ਦੇ ਜੋ ਛੁਪੇ ਆਗੂ ਪਾਹੁਲ ਛਕਣ ਤੋਂ ਮੁਨਕਰ ਹਨ, ਉਨ੍ਹਾਂ ਦੀ ਨਿਜੀ ਸੋਚ ਨੂੰ ਅੱਗੇ ਵਧਾਉਣ ਵਾਸਤੇ),

• ਮਨੁੱਖੀ ਵਿਤਕਰੇ ਦਾ ਨਾਂ ਵਰਤ ਕੇ, ਜਿਥੇ ਸਿੱਖ ਬੱਚੀਆਂ ਨੂੰ ਅਨਮਤੀਆਂ ਨਾਲ ਵਿਆਹ ਕਰਾਉਣ ਲਈ ਪ੍ਰੇਰਿਆ ਜਾਵੇ,

• ਜਿਥੇ ਸਿੱਖ ਕੌਮ ਦੀ ਲੰਬੀ ਮੰਗ ਤੋਂ ਬਾਅਦ ਹੋਂਦ ਵਿੱਚ ਆਏ ਆਨੰਦ ਮੈਰਿਜ ਐਕਟ ਨੂੰ ਰੱਦ ਕਰ ਕੇ ਹਿੰਦੂ ਮੈਰਿਜ ਐਕਟ ਦੀ ਵਕਾਲਤ ਕੀਤੀ ਜਾਵੇ(ਬੇਸ਼ਕ ਇਸ ਆਨੰਦ ਮੈਰਿਜ ਐਕਟ ਵਿੱਚ ਵੱਡੀਆਂ ਸੋਧਾਂ ਕਰਨ ਦੀ ਲੋੜ ਹੈ, ਜਿਸ ਲਈ ਉਪਰਾਲੇ ਕੀਤੇ ਜਾਣੇ ਚਾਹੀਦੇ ਹਨ),

(ਉਪਰੋਕਤ ਸਾਰੀਆਂ ਗੱਲਾਂ ਦੀ ਪੁਸ਼ਟੀ ਇਸ ਮੀਟਿੰਗ ਵਿੱਚ ਸ਼ਾਮਲ ਇਕ ਤੋਂ ਵਧ ਵੀਰਾਂ ਵਲੋਂ ਹੋ ਚੁੱਕੀ ਹੈ)
ਤੋਂ ਮੈਂ ਭਗੌੜਾ ਬਹੁਤ ਚੰਗਾ ਹਾਂ। ਕਿਉਂਕਿ ਮੇਰੇ ਸਤਿਗੁਰੂ, ਗੁਰੂ ਗ੍ਰੰਥ ਸਹਿਬ ਨੇ ਗੁਰਬਾਣੀ ਵਿੱਚ ਵੀ ਇਹੀ ਅਗਵਾਈ ਬਖਸ਼ੀ ਹੈ ਕਿ
"ਕਬੀਰ ਸਾਕਤ ਸੰਗੁ ਨ ਕੀਜੀਐ ਦੂਰਹਿ ਜਾਈਐ ਭਾਗਿ ॥"(ਪੰਨਾ ੧੩੭੧)।
ਤੱਤੁ ?ਮਤਿ ਪਰਿਵਾਰ ਦੇ ਸੰਚਾਲਕ ਵੀਰਾਂ ਨੂੰ ਮੇਰੀ ਸਨਿਮਰ ਬੇਨਤੀ ਹੈ ਕਿ ਉਹ ਪੰਥ ਦੀ ਬਰਬਾਦੀ ਲਈ ਕੀਤੇ ਜਾ ਰਹੇ ਆਪਣੇ ਐਸੇ ਉਪਰਾਲਿਆਂ ਤੋਂ ਮੈਨੂੰ ਅਗੋਂ ਵੀ ਭਗੌੜਾ ਹੀ ਸਮਝਣ ਅਤੇ ਲੋਕ ਵਿਖਾਵੇ ਵਾਸਤੇ ਕਿਸੇ ਸੱਦੇ ਪੱਤਰ ਆਦਿ ਦੀ ਉਪਚਾਰਕਤਾ ਨਾ ਕਰਨ।

ਰਾਜਿੰਦਰ ਸਿੰਘ
(ਖਾਲਸਾ ਪੰਚਾਇਤ)
ਮਿਤੀ: ੨੭. ੧੧. ੨੦੧੨

{ਨੋਟ: ਮੈਂ ਜਾਣਦਾ ਹਾਂ ਕਿ ਆਪਣੀ ਮਹਾਨ ਵਿਦਵਤਾ ਸਦਕਾ ਇਹ ਮੇਰੀ ਇਸ ਬੇਨਤੀ ਦਾ ਵੀ ਲੰਬਾ ਚੌੜਾ ਨੁਕਤਾ- ਵਾਰ ਜੁਆਬ ਦੇਣਗੇ। ਮੈਂ ਨਾ ਤਾਂ ਕਦੇ ਪਹਿਲਾਂ ਇਨ੍ਹਾਂ ਦੇ ਕਿਸੇ ਐਸੇ ਦਸਤਾਵੇਜ ਦਾ ਜੁਆਬ ਦਿੱਤਾ ਹੈ(ਕਿਉਂਕਿ ਉਹ ਦਸਾਵੇਜ ਇਸ ਕਾਬਲ ਹੀ ਨਹੀਂ ਹੁੰਦੇ) ਅਤੇ ਨਾ ਹੀ ਅੱਗੋਂ ਦੇਵਾਂਗਾ, ਕਿਉਂਕਿ ਇਤਨੇ ਮਹਾਨ ਵਿਦਵਾਨਾਂ ਦੀ ਲੇਖਣੀ ਦਾ ਕੋਈ ਜੁਆਬ ਦੇਣ ਦੀ ਮੇਰੀ ਸੋਝੀ ਅਤੇ ਸਮਰੱਥਾ ਹੀ ਨਹੀਂ ਹੈ। ਹਾਂ ਸੰਗਤਾਂ ਨੂੰ ਗੁਮਰਾਹ ਕਰਨ ਵਾਸਤੇ ਇਹ ਜੋ ਮਰਜ਼ੀ ਲਿੱਖ ਕੇ ਆਪਨੀ ਭੜਾਸ ਕੱਢ ਸਕਦੇ ਹਨ। ਮੈਂ ਤਾਂ ਕੇਵਲ 'ਧੰਨਵਾਦ' ਕਰਨਾ ਸੀ, ਸੋ ਕਰ ਦਿੱਤਾ ਹੈ। ਅੰਤ ਵਿੱਚ ਮੇਰੀ ਅਕਾਲ-ਪੁਰਖ ਦੇ ਚਰਨਾਂ ਵਿੱਚ ਜੋਦੜੀ ਹੈ ਕਿ ਜਿਸ 'ਨਿਸ਼ਕਾਮ ਨਿਮਰਤਾ ਸਹਿਤ' ਸ਼ਬਦ ਦੀ ਵਰਤੋਂ ਇਹ ਆਪਣੇ ਪੱਤਰਾਂ ਦੇ ਅੰਤ ਵਿੱਚ ਕਰਦੇ ਹਨ, ਉਸ ਦਾ ਇਕ ਕਿਨਕਾ ਹੀ ਇਨ੍ਹਾਂ ਦੀ ਝੋਲੀ ਵਿੱਚ ਪਾ ਦੇਵੇ ਤਾਂਕਿ ਵਿਦਵਤਾ ਦੀ ਹਉਮੈਂ ਦੀ ਦੀਵਾਰ ਕੁਝ ਹਿਲਣ ਨਾਲ ਸ਼ਾਇਦ ਸੱਚ ਦੀਆਂ ਕੁਝ ਕਿਰਨਾਂ ਇਨ੍ਹਾਂ ਦੀ ਸੋਚ ਤੱਕ ਪਹੁੰਚ ਸਕਣ।}

ਗੁਰੂ ਨਾਨਕ

- ਪ੍ਰੋਫੈਸਰ ਕਵਲਦੀਪ ਸਿੰਘ ਕੰਵਲ

ਗੁਰੂ ਨੂੰ ਬਾਬਾ ਬਣਾ

ਸ਼ਾਇਰ ਢਾਡੀ ਦੇ ਰਸਤਿਓਂ

ਤਿਆਰੀ ਕਰਦਾ

ਤਰਕਸ਼ੀਲ ਪੰਥ ਦਰਦੀ

ਨੀਚ ਦੇ ਸਫ਼ਰ ਦੀ

“ਬਾਬਾ” ਬੇਸ਼ੱਕ ਬਹੁਤ ਹੀ ਅਪਣੱਤ ਭਰਿਆ ਲਕਬ ਹੈ, ਤੇ ਸਹਿਜ ਸੁਭਾਏ ਵੇਖਿਆਂ ਇਸਦੀ ਵਰਤੋਂ ਉੱਤੇ ਕੋਈ ਇਤਰਾਜ਼ ਵੀ ਨਹੀਂ ਉਪਜਦਾ, ਪਰ ਲੋੜ ਹੈ ਚੇਤੰਨ ਹੋ ਕੇ ਅਜਿਹੀਆਂ ਹਰਕਤਾਂ ਪਿੱਛੇ ਛੁਪੀ ਮਨਸ਼ਾ ਨੂੰ ਸਮਝਣ ਦੀ; ਕਿ ਭਲਾ ਇਸ ਸਭ ਪਿੱਛੇ ਮਨੋਰਥ ਕਿਤੇ ਅਖੌਤੀ ਪ੍ਰੇਮ ਦੇ ਸ਼ੀਰੇ ਵਿੱਚ ਭਿਓ ਕੇ ਮੂਲ ਨਾਸ ਕਰਨ ਵਾਲਾ ਮਹੁਰਾ ਦੇਣਾ ਤਾਂ ਨਹੀਂ ?

ਗੁਰੂ ਨਹੀਂ ਰਹੇਗਾ ਤੇ ਸਿੱਖ ਦਾ ਵਜੂਦ ਵੀ ਨਹੀਂ ਬਚੇਗਾ ! ਜੇ ਸਰੀਰ ਸਮੇਤ ਸਮੁੱਚੀ ਸ਼ਖਸੀਅਤ ਤੋਂ ਮੁਨਕਰ ਹੋਣਾ ਹੈ ਤਾਂ ਜਰਾ ਸੋਚੀਏ ਕਿ ਸ਼ਬਦ ਜਾਂ ਵਿਚਾਰ ਕਿੱਥੋਂ ਪ੍ਰਗਟ ਹੋਇਆ ? ਇੱਥੇ "ਬਾਬਾ" ਲਕਬ ਦੀ ਆੜ ਹੇਠ ਗੁਰੂ ਨਾਨਕ ਦੀ ਗੁਰੂ ਪਦਵੀ ਨੂੰ ਚੈਲੰਜ ਕੀਤਾ ਜਾ ਰਿਹਾ ਹੈ, ਜੇ ਗੁਰੂ ਨਾਨਕ (ਸਮੁੱਚੀ ਸਖਸ਼ੀਅਤ ਜਿਸਦਾ ਇੱਕ ਹਿੱਸਾ ਸਰੀਰ ਵੀ ਹੈ) ਗੁਰੂ ਨਹੀਂ, ਨਿਰੋਲ ਨਹੀਂ, ਫੇਰ ਉਹਨਾਂ ਦੇ ਵਿਚਾਰ ਵੀ ਤਾਂ ਕਿਸੇ ਭੁੱਲੜ ਦੇ ਵਿਚਾਰ ਹੀ ਕਹਾਉਣਗੇ, ਨਾ ਕਿ ਸਦੀਵੀ ਕਾਇਮ ਰਹਿਣ ਵਾਲਾ ਸ਼ਬਦ ਗੁਰੂ ! ਜਿਵੇਂ ਸਮਝਣ ਦੀ ਲੋੜ ਹੈ ਕਿ ਮਾਂ ਤਾਂ ਸਰੀਰ ਸਮੇਤ ਇੱਕ ਇਸਤਰੀ ਦੀ ਸਮੁੱਚੀ ਸ਼ਖਸ਼ੀਅਤ ਹੀ ਹੈ ਤੇ ਮਾਂ ਦੀ ਮਮਤਾ ਉਸਦੀ ਭਾਵਨਾ ! ਗੁਰੂ ਤੇ ਗੁਰੂਤਾ ਵੀ ਇਹੋ ਵਿਚਾਰ ਮੰਗਦੀ ਹੈ,  ਜਿਸ ਲਈ ਲੋੜ ਹੈ ਸੂਝਵਾਨਾਂ ਦੀ ਵਿਚਾਰ ਚਰਚਾ ਦੀ, ਜੋ ਨਦਾਰਦ ਹੈ, ਤੇ ਜੋ ਹੈ ਉਹ ਹੈ ਜਾਂ ਤਾਂ ਸੰਵਾਦਹੀਨਤਾ ਦੀ ਹਾਲਤ ਵਿੱਚ ਆਪਣਾ ਤਰਕ-ਕੁਤਰਕ ਹੀ ਸੱਚ ਮੰਨਣ ਦੀ ਪ੍ਰਵਿਤੀ ਜਾਂ ਫੇਰ ਸ੍ਵੈਭੂ ਘੋਸ਼ਿਤ ਵਿਦਵਾਨ ਬਣ ਕੇ ਹਰ ਵਿਰੋਧੀ ਵਿਚਾਰ ਖਿਲਾਫ਼ ਫਤਵੇ ਜਾਰੀ ਦਾ ਰੁਝਾਨ ! ਅਸਲ ਵਿੱਚ ਇੱਥੇ ਤਾਂ ਆਪਣੀ ਕੁਤਰਕ ਨੂੰ ਹੀ "ਤੱਤ" ਤੇ ਬਾਕੀ ਸਭ ਨੂੰ "ਮਰੀ ਜ਼ਮੀਰ ਵਾਲੇ" ਇਤਿਆਦਿਕ ਵਿਸ਼ੇਸ਼ਣਾਂ ਨਾਲ ਨਿਵਾਜਣ ਵਾਲਿਆਂ ਦੀ ਤਰਕ ਦੀ ਅੰਧੀ ਫੌਜ ਖੜੀ ਹੈ ਤੇ ਉਹ ਵੀ ਝੂਠ ਦੀਆਂ ਦੁਕਾਨਾਂ ਉੱਪਰ ਸੱਚ ਦੇ ਜਾਅਲੀ ਮੋਟੋ ਲਾ ਕੇ ...

ਇੱਕ ਸਪਸ਼ਟ ਜਿਹੀ ਵਿਚਾਰ ਹੈ ਕਿ ਜੇ ਗੁਰੂ ਨਾਨਕ ਕੇਵਲ ਮਨੁੱਖ ਹੀ ਸਨ, ਆਮ ਮਨੁੱਖਾਂ ਵਰਗੇ, ਤਾਂ ਜ਼ਾਹਿਰ ਹੈ ਆਮ ਮਨੁੱਖਾਂ ਵਾਂਗ ਆਮ ਜਿਹੀਆਂ ਗਲਤੀਆਂ ਵੀ ਕਰਦੇ ਸਨ ਤਾਂ ਫੇਰ ਸੋਚੀਏ ਉਹਨਾਂ ਦੇ ਵਿਚਾਰ ਵੀ ਤਾਂ ਆਮ ਮਨੁੱਖਾਂ ਦੇ ਵਿਚਾਰਾਂ ਵਾਂਗ ਆਮ ਜਿਹੀਆਂ ਗਲਤੀਆਂ ਤੇ ਭੁਲੇਖਿਆਂ ਦੇ ਸ਼ਿਕਾਰ ਹੋਣਗੇ; ਫੇਰ ਉਹਨਾਂ ਦੀ ਵਿਚਾਰ ਸਰੂਪ ਸ਼ਬਦ ਜਾਂ ਸਦੀਵੀ "ਗੁਰੂ" ਆਖੀ ਜਾਂਦੀ ਬਾਣੀ ਨੂੰ ਨਿਰੰਕਾਰੀ ਜਾਂ ਗੁਰੂ ਮੰਨਣ ਦਾ ਸੰਕਲਪ ਹੀ ਟੁੱਟ ਗਿਆ, ਮਤਲਬ ਗੁਰੂ ਹੀ ਪੂਰੀ ਤਰ੍ਹਾਂ ਖਤਮ ਹੋ ਗਿਆ; ਤੇ ਸਿੱਖ ਪੰਥ ਦਾ ਤਾਂ ਪੂਰਾ ਦੇ ਪੂਰਾ ਵਜੂਦ ਹੀ ਗੁਰੂ ਗ੍ਰੰਥ ਸਾਹਿਬ ਦੀ ਬਾਣੀ ਦੀ ਸਦੀਵਤਾ 'ਤੇ ਟਿਕਿਆ ਹੈ, ਸੋ ਭਾਵ ਇੱਕੋ ਨਿਕਲਦਾ ਹੈ, ਭਾਵੇਂ ਭਗਵਿਆਂ ਵਲੋਂ ਜਾਂ ਫੇਰ ਲਾਲ ਝੰਡੇ ਵਾਲਿਆਂ ਵਲੋਂ, ਆਖਿਰ ਤਾਂ ਨਿਗਲਿਆ ਸਿੱਖ ਹੀ ਗਿਆ !

ਅਖੀਰ ਵਿੱਚ, ਇਹਨਾਂ ਅਖੌਤੀ ਨਵ-ਯੁਗੀਨ ਕੁਧਾਰਕਾਂ ਨੂੰ ਸ਼ਾਇਦ ਇਹ ਭੁੱਲ ਗਿਆ ਹੈ ਕਿ ਇਹਨਾਂ ਦੀਆਂ ਨਕਲੀ ਲੇਬਲ ਲੱਗੀਆਂ ਝੂਠ ਦੀਆਂ ਦੁਕਾਨਾਂ ਦੇ ਮੋਟੋ ਵਿੱਚ ਡਾਂਗ ਦੇ ਕੋਕੇ ਵਾਂਗ ਜੜੇ ਅਜਿਹੇ ਹੀ ਕੁਝ ਕੁਤਰਕ ਇਹਨਾਂ ਦੇ ਬੇਤੱਤ ਚੁੰਧਿਆਹਟ ਨਾਲ ਅੰਧੇ ਹੋਣ ਤੋਂ ਲਗਭਗ ਸਦੀ ਕੁ ਪਹਿਲਾਂ ਭਦੌੜੀ ਮਾਤਾ ਦੇ ਉਦਰ ਤੋਂ ਵੀ ਉਤਪਨ ਹੋਏ ਸਨ, ਤੇ ਫੇਰ ਬਿਨਾਂ ਘਤਿੱਤ ਦੇ ਸਿਰੇ ਲੱਗੇ ਉਸੇ ਪ੍ਰਕਾਰ ਤੱਤ-ਰਹਿਤ ਹੋ ਕੇ ਪਰਮ ਧੁੰਦਕਾਰ ਵਿੱਚ ਲੀਨ ਹੋ ਗਏ !

ਸ਼ਾਇਦ ਇਤਿਹਾਸ ਆਪਣੇ ਆਪਨੂੰ ਦੁਹਰਾਉਂਦਾ ਹੈ ...

ਕੁਝ ਸਵਾਲ ਟੀ.ਜੀ.ਪੀ. ਦੇ ਨਾਮ

ਪਿਛਲੇ ਦਿਨੀ ਟੀ.ਜੀ.ਪੀ. ਸੰਸਥਾ ਨੇ ਇੱਕ ਲੰਮਾ ਲੇਖ ਮੇਰੇ ਕੁਝ ਲੇਖਾਂ ਦੇ ਪਰਿਕਰਮ ਵਜੋਂ ਲਿਖ ਕੇ ਵੱਖ-੨ ਵੈਬਸਾਇਟਜ਼ ਉੱਪਰ ਛਪਣ ਵਾਸਤੇ ਭੇਜਿਆ ਸੀ ਜਿਸ ਵਿੱਚ ਉਹਨਾਂ ਨੇ ਮੇਰੇ ਕਿਸੇ ਝੂਠ ਦਾ ਪਰਦਾਫਾਸ਼ ਕਰਨ ਦਾ ਦਾਅਵਾ ਕੀਤਾ, ਪਤਾ ਨਹੀਂ ਉਹ ਪਰਦਾਫਾਸ਼ ਹੋਇਆ ਜਾਂ ਨਹੀਂ ਪਰ ਸਾਰਾ ਲੇਖ ਉਹਨਾਂ ਨੇ ਨਿਜੀ ਅਤੇ ਗੈਰ-ਸੰਬੰਧਿਤ ਤੋਹਮਤਾਂ ਲਗਾਉਣ ਵਿੱਚ ਗੁਜ਼ਾਰ ਦਿੱਤਾ, ਅਤੇ ਜੋ ਸਵਾਲ ਜਾਂ ਮੁੱਦੇ ਉਠਾਏ ਸਨ ਉਹਨਾਂ ਵਿੱਚੋਂ ਕਿਸੇ ਦਾ ਵੀ ਸਪਸ਼ਟ ਜਵਾਬ ਨਹੀਂ ਦਿੱਤਾ ! ਖੈਰ ਉਹਨਾਂ ਦੀ ਸੁਹਿਰਦਤਾ ਉਹਨਾਂ ਨੂੰ ਮੁਬਾਰਕ, ਪਰ ਜੇ ਉਠਾਏ ਨੁਕਤਿਆਂ ‘ਤੇ ਇੱਕ-ਦੋ ਲਫਜ਼ਾਂ ਦੇ ਹਾਂ ਜਾਂ ਨਾਂਹ ਰੂਪੀ ਪ੍ਰਤੀਕਰਮ ਵੀ ਸਾਹਮਣੇ ਰੱਖ ਦੇਂਦੇ ਤਾਂ ਸ਼ਾਇਦ ਪਾਠਕਾਂ ਨੂੰ ਨਿੰਦਿਆ-ਚੁਗਲੀ ਤੋਂ ਇਲਾਵਾ ਕੋਈ ਹੋਰ ਜਾਣਕਾਰੀ ਵੀ ਉਪਲਭਧ ਹੋ ਜਾਣੀ ਸੀ !

ਚਲੋ ਹੋ ਸਕਦਾ ਹੈ ਸਿੱਖ ਰਹਿਤ ਮਰਿਆਦਾ ਦੇ ਸੁਧਾਰ ਦਾ ਸੁਫ਼ਨਾ ਵੇਖਣ ਵਾਲਿਆਂ ਨੂੰ ਮੇਰੇ ਕੁਝ ਲੇਖਾਂ ਵਿੱਚ ਉਠਾਏ ਸੌਖੇ ਜਿਹੇ ਮੁੱਦੇ ਤੇ ਸਵਾਲ ਸਮਝ ਹੀ ਨਾ ਆਏ ਹੋਣ, ਸੋ ਮੈਂ ਹੀ ਦੁਬਾਰਾ ਕੋਸ਼ਿਸ਼ ਕਰ ਕੇ ਉਹਨਾਂ ਸਵਾਲਾਂ ਨੂੰ ਹੋਰ ਸੌਖਿਆਂ ਕਰ ਕੇ ਇਸ ਲੜੀ ਦੇ ਪਹਿਲੇ ਭਾਗ ਵਿੱਚ ਕੁਝ ਪ੍ਰਸ਼ਨ ਉਹਨਾਂ ਤੋਂ ਪੁੱਛ ਲੈਂਦਾ ਹਾਂ; ਇਸ ਆਸ ਨਾਲ ਕਿ ਉਹਨਾਂ ਦਾ ਪ੍ਰਤੀਕਰਮ ਉਜੱਡ ਤੇ ਉਬਾਊ ਨਾ ਹੋ ਕੇ ਸਿਰਫ਼ ਹਾਂ ਜਾਂ ਨਾਂਹ ਤੱਕ ਹੀ ਸੀਮਿਤ ਹੋਵੇਗਾ ਕਿਉਂਕਿ ਹਰ ਮਾਧਿਅਮ ‘ਤੇ ਉਹ ਵੈਸੇ ਵੀ ਬਾਰ-੨ ਆਪਣੇ ਕੋਲ ਘੱਟ ਸਮਾਂ ਹੋਣ ਦਾ ਟਾਲ-ਮਟੋਲਾ ਤਾਂ ਦਿੰਦੇ ਹੀ ਰਹਿੰਦੇ ਹਨ | ਸੋ ਪ੍ਰਸ਼ਨ ਇਸ ਪ੍ਰਕਾਰ ਹਨ :

੧. ਕੀ ਤੁਸੀਂ ਦੱਸ ਦੱਸ ਗੁਰੂ ਸਾਹਿਬਾਨ ਦੇ “ਜੀਵਨ ਆਚਰਨ” ਦੀ ਸੇਧ ਅਤੇ ਇੱਕ ਜਿਗਿਆਸੂ ਸਿੱਖ ਲਈ ਉਹਨਾਂ ਦੇ “ਗੁਰੂ” ਦੀ ਪਦਵੀ ਨੂੰ ਮੰਨਦੇ ਹੋ ?

੨. ਕੀ ਆਪ ਭੱਟ-ਬਾਣੀ ਨੂੰ ਬਿਨਾਂ ਕਿਸੇ ਵੀ ਸ਼ਕ-ਸ਼ੰਕੇ ਦੇ ਗੁਰਬਾਣੀ ਸਵੀਕਾਰਦੇ ਹੋ ?

੩. ਕੀ ਤੁਸੀਂ ਸਿੱਖੀ ਦੀ ਅਧਾਰ-ਸਤੰਭ ਗੁਰਦਵਾਰਾ/ਧਰਮਸਾਲ ਵਿਵਸਥਾ ਵਿੱਚ ਯਕੀਨ ਰੱਖਦੇ ਹੋ ?

੪. ਕੀ ਤੁਸੀਂ ਨਿਸ਼ਾਨ ਸਾਹਿਬ ਦੀ ਹੋਂਦ ਅਤੇ ਸਿਧਾਂਤ ਅਤੇ ਸਿੱਖਾਂ ਦੀ ਇੱਕ ਕੌਮ ਵਜੋਂ ਪਹਿਚਾਣ ਨੂੰ ਸਵੀਕਾਰਦੇ ਹੋ ?

੫. ਕੀ ਤੁਸੀਂ ਗੁਰਦਵਾਰਾ ਸੰਸਥਾ ਵਿੱਚ ਅਤੇ ਹੋਰ ਹਰ ਪ੍ਰਕਾਰ ਦੇ ਸਿੱਖ ਸੰਸਕਾਰਾਂ/ਸਮਾਗਮਾਂ ਲਈ ਗੁਰੂ ਗ੍ਰੰਥ ਸਾਹਿਬ ਦੇ ਪੋਥੀ ਸਰੂਪ ਦੇ ਪ੍ਰਕਾਸ਼ ਨੂੰ ਜ਼ਰੂਰੀ ਮੰਨਦੇ ਹੋ ?

੬. ਕੀ ਤੁਸੀਂ ਗੁਰੂ ਗਰੰਥ ਸਾਹਿਬ ਦੇ ਪੋਥੀ ਸਰੂਪ ਅੱਗੇ ਮੱਥਾ ਟੇਕਣ ਦੇ ਮਾਣਮੱਤੇ ਸਿੱਖ ਵਿਸ਼ਵਾਸ਼ ਵਿੱਚ ਯਕੀਨ ਰੱਖਦੇ ਹੋ ਅਤੇ ਇਸਨੂੰ ਅਗਿਆਨ-ਵੱਸ ਕੁਝ ਧਿਰਾਂ ਵਲੋਂ ਮੂਰਤੀ-ਪੂਜਾ ਜਾਂ ਗੁਲਾਮੀ ਦੇ ਪ੍ਰਤੀਕ ਮੰਨਣ ਦਾ ਬਿਨਾਂ ਕਿਸੇ ਦੁਬਿਧਾ ਵਿਰੋਧ ਕਰਦੇ ਹੋ ?

੭. ਕੀ ਤੁਸੀਂ ਗੁਰਬਾਣੀ ਦੇ ਪਚਾਰ ਵਿੱਚ ਗੁਰੂ ਸਾਹਿਬਾਨ ਵਲੋਂ ਆਪ ਪ੍ਰਯੁਕਤ ਕੀਤੇ ਗਏ ਰਾਗਾਂ, ਉਪ-ਰਾਗਾਂ, ਰਾਗਣੀਆਂ, ਤਾਲਾਂ, ਧੁਨਾਂ ਇਤਿਆਦਿਕ ਦੇ ਯੋਗਦਾਨ ਅਤੇ ਕੀਰਤਨ ਪਰੰਪਰਾ ਦੀ ਸਿੱਖੀ ਦੇ ਮੁਢਲੇ ਅਧਾਰ ਸਤੰਭ ਵਜੋਂ ਹੋਂਦ ਨੂੰ ਸਵੀਕਾਰਦੇ ਹੋ ?

੮. ਕੀ ਤੁਸੀਂ ਕੜਾਹ-ਪ੍ਰਸ਼ਾਦਿ ਦੇ ਸੰਕਲਪ ਨੂੰ ਮੰਨਦੇ ਹੋ ?

੯. ਕੀ ਤੁਸੀਂ ਇੱਕ ਸਿੱਖ ਦੇ ਜਨਮ-ਮਰਗ ਜਾਂ ਹੋਰ ਜੀਵਨ ਸੰਸਕਾਰਾਂ ਸਮੇਂ ਕੀਤੇ ਕਿਸੇ ਵੀ ਸਮਾਗਮ ਵਿੱਚ ਗੁਰਬਾਣੀ ਦੇ ਪੜ੍ਹਨ ਜਾਂ ਹਰਖ/ਸੋਗ ਹਾਲਾਤਾਂ ਵਿੱਚ ਅਕਾਲ ਪੁਰਖ ਅੱਗੇ “ਅਰਦਾਸ” ਦੀ ਮਹੱਤਤਾ ਨੂੰ ਸਵੀਕਾਰਦੇ ਹੋ ?

੧੦. ਕੀ ਤੁਸੀਂ ਅਨੰਦੁ ਕਾਰਜ ਦੀ ਸਿੱਖ ਪਰੰਪਰਾ – ਜਿਸ ਰਾਹੀਂ ਸਿੱਖ ਬੱਚੇ-ਬੱਚੀ ਦੇ “ਕੇਵਲ” ਸਿੱਖ ਬੱਚੇ-ਬੱਚੀ ਨਾਲ, ਗੁਰੂ ਗਰੰਥ ਸਾਹਿਬ ਵਿੱਚ ਦਰਜ ਗੁਰਬਾਣੀ ਦਾ ਆਸਰਾ ਲੈ ਕੇ, ਵਿਆਹਕ ਸੰਬੰਧ ਸ਼ੁਰੂ ਕਰਨ ਦਾ ਸਿਧਾਂਤ ਦਿੱਤਾ ਗਿਆ ਹੈ – ਨੂੰ ਸਵੀਕਾਰਦੇ ਹੋ ?

੧੧. ਕੀ ਆਪ ਸਿਧਾਂਤਕ ਰੂਪ ਸਿੱਖ ਬੱਚੇ-ਬੱਚੀ ਨੂੰ ਆਪਣਾ ਯੋਗ ਜੀਵਨ ਸਾਥੀ ਸਿੱਖ ਮੱਤ ਵਿੱਚੋਂ ਹੀ ਲਭਣ ਦਾ ਯਤਨ ਕਰਨ ਦੀ ਪ੍ਰੇਰਨਾ ਦੇਣ ਵਿੱਚ ਯਕੀਨ ਰੱਖਦੇ ਹੋ ?

੧੨. ਕੀ ਆਪ ਖੰਡੇ ਦੀ ਪਾਹੁਲ ਦੇ ਸਿਧਾਂਤ, ਪੰਜ ਕਕਾਰਾਂ ਦੀ ਲਾਜ਼ਿਮ ਅਤੇ ਚਾਰ ਕੁਰਹਿਤਾਂ ਤੋਂ ਵਰਜ ਦੇ ਜਰੂਰੀ ਸੰਕਲਪਾਂ ਨੂੰ ਸਵੀਕਾਰਦੇ ਹੋ ?

ਆਸ ਹੈ ਆਪ ਵਲੋਂ ਬਿਲਕੁਲ ਸਪਸ਼ਟ, ਸੰਖੇਪ ਤੇ ਬਿਨਾਂ ਨਿਜੀ ਵਿਰੋਧ ਦੇ ਦਿੱਤੇ ਜਵਾਬ ਹੀ ਸਾਹਮਣੇ ਆਉਣਗੇ ...

ਅਤੇ ਅਜਿਹਾ ਹੋਣ ਦੀ ਸੂਰਤ ਵਿੱਚ ਪੂਰਨ ਸੁਹਿਰਦਤਾ ਅਤੇ ਬਿਨਾਂ ਕਿਸੇ ਪਿਛਲੇ ਵਖਰੇਵੇਂ ਨੂੰ ਸਾਹਮਣੇ ਰੱਖੇ ਕੁਝ ਹੋਰ ਸਵਾਲ ਜਵਾਬਾਂ ਸਹਿਤ ਉਸਾਰੂ ਚਰਚਾ ਕਰਨ ਲਈ ਯਤਨਸ਼ੀਲ ...

ਪ੍ਰੋਫੈਸਰ ਕਵਲਦੀਪ ਸਿੰਘ ਕੰਵਲ